کیلیفورنیا( ویب ڈیسک)ایپل کے نئے آئی فون 18 پرو اور آئی فون 18 پرو میکس کی فروخت شروع ہونے کے چند ہفتوں بعد ہی صارفین نے فون کی بیرونی رنگت تبدیل ہونے کی شکایات کرنا شروع کردی ہیں۔ رپورٹس کے مطابق یہ مسئلہ مختلف ماڈلز میں دیکھا گیا ہے، تاہم برگنڈی رنگ کے فون زیادہ متاثر دکھائی دیتے ہیں۔صارفین کا کہنا ہے کہ رنگت میں تبدیلی خاص طور پر فون کے پچھلے حصے میں تین کیمروں کے گرد نمایاں ہے۔ بعض صارفین کے مطابق فون صاف کرنے کے باوجود رنگت پہلے جیسی نہیں ہوتی اور یہ مسئلہ گرد، چکنائی یا کسی ظاہری نقصان کے باعث پیدا نہیں ہوا۔تاحال اس تبدیلی کی حتمی وجہ معلوم نہیں ہوسکی۔ ایک صارف نے امکان ظاہر کیا ہے کہ کیمروں کے استعمال کے دوران پیدا ہونے والی حرارت اس حصے کی رنگت بدلنے کا سبب بن سکتی ہے۔ متعدد صارفین کی شکایات سے ظاہر ہوتا ہے کہ یہ مسئلہ صرف ایک فون تک محدود نہیں۔ایپل نے اس معاملے پر اب تک کوئی باضابطہ بیان جاری نہیں کیا، جبکہ یہ بھی واضح نہیں کہ کمپنی متاثرہ فونز کی مرمت یا تبدیلی کی سہولت فراہم کرے گی یا نہیں۔اس سے قبل آئی فون 17 پرو کے بعض نارنجی رنگ کے ماڈلز کی رنگت بدلنے کی شکایات بھی سامنے آئی تھیں۔ گزشتہ برس کمپنی نے متاثرہ فونز مفت تبدیل کیے تھے۔ تاہم دستیاب اطلاعات کے مطابق آئی فون 17 پرو میں یہ مسئلہ اتنے بڑے پیمانے پر رپورٹ نہیں ہوا تھا جتنا آئی فون 18 پرو کے حوالے سے دعویٰ کیا جارہا ہے۔
