ایران اور پاکستان کے درمیان ایل پی جی اسٹوریج و سرمایہ کاری کے معاہدے پر دستخط

 اسلام آباد( کامرس ڈیسک)ایران نے پاکستان میں ایل پی جی اسٹوریج اور سرمایہ کاری کے لیے اہم معاہدے پر دستخط کر دیے ہیں، جس سے دونوں ممالک کے درمیان تجارتی تعاون کو نئی سمت ملنے کی توقع ظاہر کی جا رہی ہے۔جنگ بندی کے بعد ایران نے پاکستان کے ساتھ بڑے پیمانے پر تجارت بڑھانے کا فیصلہ کیا ہے اور اسی سلسلے میں دو ماہ کے دوران ایرانی تجارتی وفد دوسری مرتبہ کراچی پہنچا۔یہ وفد وفاق ہائے ایوان صنعت و تجارت پاکستان میں پہنچا جہاں مختلف معاہدوں پر دستخط کیے گئے۔ وفد میں کان کنی کے شعبے کے سرمایہ کار اور چاول کی درآمد سے متعلق کاروباری نمائندے بھی شامل تھے۔فیڈریشن کے رہنما محمد علی حیدر کے مطابق معاہدے کا مقصد توانائی اور تجارتی شعبوں میں تعاون کو فروغ دینا ہے، جبکہ فریقین نے پاک ایران تجارت کا حجم آئندہ برسوں میں 10 ارب ڈالر تک بڑھانے کے عزم کا اعادہ کیا ہے۔