تہران( مانیٹرنگ ڈیسک)ایرانی وزیر خارجہ عباس عراقچی نے دعویٰ کیا ہے کہ ایران کے ساتھ جنگ کے دوران امریکی فوج کو ہونے والا جانی و عسکری نقصان امریکی حکومت کے سرکاری اعداد و شمار سے کہیں زیادہ ہے۔سماجی رابطے کی ویب سائٹ ’ایکس‘ پر بیان میں عباس عراقچی نے کہا کہ مئی میں امریکی کانگریس کی ریسرچ سروس نے تسلیم کیا تھا کہ ایرانی مسلح افواج نے 42 امریکی فوجی طیارے تباہ کیے تھے، تاہم اب یہ تعداد 81 تک پہنچ چکی ہے۔ایرانی وزیر خارجہ نے اپنے دعوے کی حمایت میں امریکی فوجی اڈوں کی صورتحال پر بھی سوال اٹھایا۔ ان کا کہنا تھا کہ اگر امریکی فوجی اڈوں کو کوئی بڑا نقصان نہیں پہنچا تو امریکی سینٹرل کمانڈ ایک موجودہ سینیٹر کو ان اڈوں کا معائنہ کرنے کی اجازت کیوں نہیں دے رہی۔عباس عراقچی نے امریکی حکومت کی جانب سے جنگی نقصانات سے متعلق جاری کیے گئے اعداد و شمار پر بھی سوالات اٹھائے۔ تاہم ان کے طیاروں کی تباہی اور امریکی فوجیوں کی ہلاکتوں سے متعلق دعووں کی آزادانہ طور پر فوری تصدیق نہیں ہوسکی، جبکہ یہ بھی واضح نہیں کیا گیا کہ 81 طیاروں میں کس نوعیت کے طیارے شامل ہیں۔
