ایران کا آبنائے ہرمز میں دو آئل ٹینکرز پر بارودی سرنگوں سے حملے کا دعویٰ

تہران (مانیٹرنگ ڈیسک) ایران کی پاسدارانِ انقلاب کی بحریہ نے دعویٰ کیا ہے کہ آبنائے ہرمز کے جنوبی حصے میں دو آئل ٹینکرز ایرانی بحری بارودی سرنگوں سے ٹکرا کر آگ کی لپیٹ میں آگئے، جس کے بعد ان کی نقل و حرکت روک دی گئی۔خبر رساں ادارے اے ایف پی کے مطابق پاسدارانِ انقلاب نے اپنے سرکاری خبر رساں پلیٹ فارم سپاہ نیوز پر جاری بیان میں کہا کہ دونوں ٹینکرز ایسے بحری راستے سے گزرنے کی کوشش کر رہے تھے جسے تہران غیر قانونی قرار دیتا ہے۔ایرانی بحریہ کے مطابق بارودی سرنگوں کے دھماکوں کے نتیجے میں دونوں ٹینکرز میں آگ بھڑک اٹھی اور ان کی نقل و حرکت رک گئی۔تاہم ایرانی فورسز نے واقعے کا وقت، ٹینکرز کے نام، ان کی ملکیت اور عملے کو ممکنہ جانی نقصان سے متعلق تفصیلات جاری نہیں کیں۔ اس دعوے کی آزادانہ تصدیق بھی سامنے نہیں آئی۔پاسدارانِ انقلاب نے یہ دعویٰ بھی کیا کہ ایران نے پیر کی رات ایک امریکی ڈرون مار گرایا تھا، تاہم اس حوالے سے امریکی حکام کی تصدیق یا تردید سے متعلق تفصیلات فراہم نہیں کی گئیں۔واضح رہے کہ آبنائے ہرمز عالمی سطح پر تیل کی ترسیل کی اہم ترین گزرگاہوں میں شامل ہے۔ یہاں بحری آمدورفت متاثر ہونے سے علاقائی سلامتی اور عالمی توانائی کی منڈیوں پر اثرات مرتب ہونے کا خدشہ ہے۔