امریکی حملوں کے جواب میں خطے میں امریکی فوجی ٹھکانوں کو نشانہ بنایا گیا: ایران کا دعویٰ

تہران( مانیٹرنگ ڈیسک) ایرانی پاسدارانِ انقلاب نے دعویٰ کیا ہے کہ ایرانی ساحلی علاقوں پر مبینہ امریکی حملوں کے جواب میں خطے میں موجود امریکی فوجی ٹھکانوں کو نشانہ بنایا گیا ہے۔پاسدارانِ انقلاب کی جانب سے اہداف کے مقام، حملے کی نوعیت یا ممکنہ نقصانات سے متعلق کوئی تفصیلات جاری نہیں کی گئیں۔اس سے قبل امریکہ نے دعویٰ کیا تھا کہ آبنائے ہرمز میں ایران کی جانب سے ایک تجارتی جہاز کو نشانہ بنانے کے بعد ایران کے میزائل اور ڈرون ذخیرہ کرنے کے مقامات اور ساحلی ریڈار تنصیبات کو نشانہ بنایا گیا۔بعد ازاں ایرانی پاسدارانِ انقلاب نے کہا کہ امریکی حملے کا جواب ضرور دیا جائے گا اور اس کارروائی کو بغیر ردعمل کے نہیں چھوڑا جائے گا۔ایرانی خبر رساں ایجنسی کے مطابق اسلامی انقلابی گارڈ کور (آئی آر جی سی) نے اپنے بیان میں دعویٰ کیا کہ اس کی بحری اور فضائی افواج نے سیریک جزیرے پر کیے گئے امریکی حملے کو ناکام بنا دیا اور اس کے اثرات کو غیر مؤثر کر دیا۔بیان میں کہا گیا ہے کہ اس جارحیت کا جواب ضرور دیا جائے گا اور ردعمل مناسب وقت اور مقام پر تیز اور فیصلہ کن ہوگا۔آئی آر جی سی نے مزید خبردار کیا کہ اگر امریکہ نے کوئی نئی کارروائی کی تو اسے سخت جواب دیا جائے گا۔