تہران( مانیٹرنگ ڈیسک) ایرانی وزارت خارجہ کے ترجمان اسماعیل بقائی نے ایران اور پاکستان کے تعلقات کو موجودہ دور کے بہترین مراحل میں قرار دیتے ہوئے کہا ہے کہ دونوں ممالک کے درمیان دوطرفہ روابط میں مسلسل بہتری آرہی ہے۔پریس بریفنگ میں اسماعیل بقائی نے بتایا کہ پاکستان کے آرمی چیف کا طے شدہ دورہ ایران دونوں ممالک کے باہمی تعلقات اور مشترکہ امور پر مرکوز ہوگا۔انہوں نے کہا کہ ایران اور پاکستان اس وقت ’’بہترین مراحل میں سے ایک‘‘ سے گزر رہے ہیں اور دونوں ممالک باہمی تعاون سمیت علاقائی معاملات پر مسلسل رابطے میں ہیں۔ایرانی ترجمان نے ایران کے خلاف جاری جنگ کے حوالے سے کہا کہ تہران نے جنگ کا آغاز نہیں کیا بلکہ اپنی خودمختاری اور علاقائی سالمیت کا دفاع کیا ہے۔ ان کے مطابق ایران جنگ کے خاتمے کے لیے مخالفین کی شرائط قبول نہیں کرے گا۔اسماعیل بقائی نے کہا کہ ایران کسی جارح فریق کو جنگ کے اختتام کی شرائط طے کرنے کی اجازت نہیں دے گا اور ریاستی ادارے ملکی خودمختاری کے تحفظ کے لیے پرعزم ہیں۔انہوں نے مزید کہا کہ جنگ شروع کرنے والے فریق کو اپنے اقدامات کا جواب دینا ہوگا، جبکہ ایران قومی خودمختاری اور علاقائی سالمیت کے دفاع کے عزم پر قائم ہے۔
