تہران( مانیٹرنگ ڈیسک)ایرانی پاسداران انقلاب کی بری فوج کے کمانڈر محمد کرمی نے کہا ہے کہ ایران دشمن کی جانب سے کسی بھی غلط اندازے یا جارحانہ اقدام کا بھرپور طاقت سے جواب دینے کے لیے مکمل طور پر تیار ہے۔انہوں نے کہا کہ ایران نے کسی بھی ممکنہ حملے یا مخالف قوت کی غلطی سے نمٹنے کے لیے ضروری صلاحیت اور تیاری برقرار رکھی ہوئی ہے۔اس سے قبل تہران میں امام حسین چوک سے انقلاب چوک تک ایک بڑا جلوس نکالا گیا، جس میں ’’جان فدا‘‘ مہم کی جنگی بٹالینز اور مختلف شعبوں سے تعلق رکھنے والے افراد نے شرکت کی۔ایرانی ذرائع ابلاغ کے مطابق ملک کو درپیش ممکنہ خطرات سے نمٹنے کے لیے ’’جان فدا‘‘ مہم کے تحت 3 لاکھ 13 ہزار رضاکار متحرک کیے گئے ہیں۔مہم کی ریلی سے خطاب کرتے ہوئے بسیج تنظیم کے سربراہ حسین طائب نے اسے عالمی جنگی تاریخ کی سب سے بڑی عوامی مہم قرار دیا۔ ان کے مطابق یہ مہم ایران کے جمہوری تشخص اور عوام کے عزم و استقامت کی علامت ہے۔
