امریکی جواب کا جائزہ جاری، ایران ثالثوں کے ذریعے واشنگٹن کو ردعمل دے گا

تہران ( مانیٹرنگ ڈیسک)ایران نے کہا ہے کہ وہ آبنائے ہرمز دوبارہ کھولنے سے متعلق اپنی تجویز پر امریکا کے جواب کا جائزہ لے رہا ہے، جس کے بعد تہران ثالثوں کے ذریعے واشنگٹن کو اپنا ردعمل بھجوائے گا۔خبر رساں ادارے رائٹرز کے مطابق ایرانی وزارت خارجہ کے ترجمان اسماعیل بقائی نے پریس کانفرنس میں بتایا کہ ایران کو امریکی جواب موصول ہو چکا ہے اور اس کا جائزہ لیا جا رہا ہے۔ ان کا کہنا تھا کہ یہ عمل مکمل ہونے کے بعد ایران ثالثوں کے ذریعے امریکا کو جواب دے گا۔اسماعیل بقائی نے مزید کہا کہ ایران اور متعلقہ فریقوں کے درمیان ثالثوں کے ذریعے پیغامات کا تبادلہ بدستور جاری ہے، تاہم انہوں نے سفارتی رابطوں کی مزید تفصیلات بتانے سے گریز کیا۔ایرانی بیان سے ظاہر ہوتا ہے کہ آبنائے ہرمز کو دوبارہ کھولنے کے معاملے پر سفارتی کوششیں جاری ہیں، تاہم تہران کے حتمی ردعمل اور مذاکرات کے ممکنہ نتائج کے بارے میں تاحال کوئی تفصیل سامنے نہیں آئی۔آبنائے ہرمز عالمی سطح پر تیل کی ترسیل کے لیے ایک اہم بحری گزرگاہ ہے۔ اس لیے اسے دوبارہ کھولنے سے متعلق پیش رفت عالمی توانائی کی منڈیوں اور خطے کی صورت حال پر اثر انداز ہو سکتی ہے۔