ایران کا آبنائے ہرمز میں قوانین توڑنے والے جہازوں کو جرمانے، حراست اور ضبطی کا انتباہ

 تہران( مانیٹرنگ ڈیسک)ایران نے شپنگ کمپنیوں کو خبردار کیا ہے کہ آبنائے ہرمز میں ایرانی قوانین کی خلاف ورزی کرنے والے بحری جہازوں کو جرمانے، حراست یا ضبطی کا سامنا کرنا پڑ سکتا ہے۔میڈیا رپورٹس کے مطابق تہران نے خلاف ورزیوں کے الزام میں بعض بحری جہازوں کی جانچ کا دائرہ وسیع کر دیا ہے جبکہ امریکا کے ساتھ نیوی گیشن انتظامات پر مذاکرات میں تعطل کے دوران آبنائے ہرمز استعمال کرنے والے تجارتی آپریٹرز پر دباؤ بھی بڑھا دیا گیا ہے۔ایران کا کہنا ہے کہ اس کی نقل و حمل کی ضروریات کی خلاف ورزی کرنے والے جہاز اگر دوبارہ آبنائے ہرمز سے گزرنے کی کوشش کریں گے تو ان کے خلاف جرمانے، حراست یا ضبطی کی کارروائی کی جا سکتی ہے۔خلیج فارس آبنائے اتھارٹی نے شپنگ کمپنیوں کو جہازوں کی فہرستوں کا جائزہ لینے کی ہدایت کی ہے۔ ایکس پر جاری بیان میں خلیجی ریاستوں سے یا ان تک سامان منتقل کرنے والی کمپنیوں کو مشورہ دیا گیا ہے کہ چارٹر طے کرنے سے قبل ایرانی قوانین کی خلاف ورزی کرنے والے جہازوں کے تازہ ترین ریکارڈ کی جانچ کرلیں۔اتھارٹی کے مطابق یہ جانچ ان جہازوں تک بھی بڑھائی جائے گی جو پہلے سے فہرست میں شامل بحری جہازوں کے ساتھ کام کرتے ہیں، جن میں جہازوں کی منتقلی، ٹرانس شپمنٹ اور دیگر متعلقہ سمندری سرگرمیاں شامل ہیں۔