اسلام آباد (پاکستان خبر) فیلڈ مارشل سید عاصم منیر سے ایرانی وزیر خارجہ عباس عراقچی نے ٹیلی فون پر رابطہ کیا، جس کے دوران خطے کی موجودہ صورتحال پر تبادلہ خیال کیا گیا۔میڈیا رپورٹس کے مطابق دونوں رہنماؤں نے اہم علاقائی معاملات سمیت باہمی دلچسپی کے مختلف امور پر گفتگو کی اور تازہ پیش رفت کے حوالے سے ایک دوسرے سے خیالات کا اظہار کیا۔ایرانی سرکاری خبر ایجنسی نے بھی رابطے کی تصدیق کرتے ہوئے بتایا کہ عباس عراقچی نے یہ گفتگو چین کے سرکاری دورے کے دوران کی۔مذاکرات میں پاک ایران سرحدی صورتحال اور خطے میں پائیدار امن کے قیام کیلئے مشترکہ کوششوں پر بھی بات چیت ہوئی، جبکہ دونوں جانب سے باہمی تعاون بڑھانے پر زور دیا گیا۔عسکری و سفارتی حلقوں کے مطابق موجودہ علاقائی صورتحال میں دونوں پڑوسی ممالک کے اعلیٰ حکام کے درمیان یہ رابطہ اہمیت کا حامل ہے اور اس سے علاقائی سلامتی کے حوالے سے باہمی ہم آہنگی کو مزید بہتر بنانے میں مدد مل سکتی ہے۔
