پاکستان اور ایران کا خطے میں امن و استحکام کے لیے تعاون جاری رکھنے پر اتفاق

اسلام آباد( پاکستان خبر) وزیر خارجہ اسحاق ڈار اور ایرانی وزیر خارجہ عباس عراقچی کے درمیان ٹیلی فونک رابطہ ہوا ہے، جس میں خطے میں قیام امن کے لیے مشترکہ عزم کا اعادہ کیا گیا۔نائب وزیراعظم و وزیر خارجہ سینیٹر محمد اسحاق ڈار نے گزشتہ شب ایرانی ہم منصب سے گفتگو کی، جس میں خطے میں امن و استحکام اور دوطرفہ تعاون سے متعلق امور پر تبادلہ خیال کیا گیا۔دفتر خارجہ کے مطابق اسحاق ڈار نے کہا کہ پاکستان خطے اور عالمی سطح پر دیرپا امن و استحکام کے لیے اپنا تعمیری کردار ادا کرتا رہے گا۔گفتگو کے دوران ایرانی وزیر خارجہ عباس عراقچی نے امن کے عمل کو آگے بڑھانے کے لیے پاکستان کی مسلسل حمایت کو سراہا اور اس پر اظہارِ تشکر کیا۔ انہوں نے ایران کے عملے اور ماہی گیروں کی محفوظ وطن واپسی میں پاکستان کے تعاون پر بھی شکریہ ادا کیا۔