اسلام آباد (پاکستان خبر) نائب وزیراعظم و وزیر خارجہ سینیٹر محمد اسحاق ڈار نے ترک وزیر خارجہ حاقان فیدان سے ٹیلیفون پر رابطہ کیا، جس میں دوطرفہ تعلقات اور باہمی دلچسپی کے علاقائی امور پر تبادلہ خیال کیا گیا۔وزارت خارجہ کے مطابق دونوں وزرائے خارجہ نے فلسطین کے معاملے پر اپنے مشترکہ مؤقف کا اعادہ کرتے ہوئے 8 عرب و اسلامی ممالک کے مشترکہ بیان کی حمایت کی۔ بیان میں برطانیہ کی جانب سے غیر قانونی اسرائیلی بستیوں سے درآمدات اور ان سے منسلک خدمات پر پابندی کے فیصلے کا خیرمقدم کیا گیا ہے۔دونوں رہنماؤں نے برطانیہ سمیت دیگر یورپی ممالک کے 2 ریاستی حل سے متعلق مشترکہ بیان کی بھی حمایت کی۔اس موقع پر سعودی عرب اور مصر کے ساتھ علاقائی 4 ملکی فورم (آر فور) کے تحت علاقائی معاملات پر مسلسل قریبی مشاورت کی اہمیت پر زور دیا گیا۔اسحاق ڈار اور حاقان فیدان نے اقوام متحدہ کی جنرل اسمبلی کے آئندہ اجلاس کے موقع پر نیویارک میں ملاقات کرنے پر بھی اتفاق کیا۔
