اسلام آباد( پاکستان خبر)اردن کے دارالحکومت عمان میں یروشلم سے متعلق وزارتی اجلاس کے موقع پر نائب وزیراعظم اور وزیر خارجہ اسحاق ڈار نے دیگر وزرائے خارجہ اور اعلیٰ شخصیات کے ہمراہ اردن کے فرمانروا شاہ عبداللہ دوم بن الحسین سے ملاقات کی۔ملاقات کے دوران اسحاق ڈار نے صدر آصف علی زرداری، وزیراعظم محمد شہباز شریف، چیف آف ڈیفنس فورسز فیلڈ مارشل سید عاصم منیر اور پاکستانی عوام کی جانب سے شاہ عبداللہ دوم کو خیرسگالی اور نیک تمناؤں کے پیغامات پہنچائے۔اردن کے فرمانروا نے بھی پاکستان کی قیادت اور عوام کے لیے خیرسگالی کے جذبات کا اظہار کیا۔اسحاق ڈار نے بیت المقدس کے مقدس مقامات کی سرپرستی اور خطے میں امن و استحکام کے لیے اردن کے کردار کو سراہا۔ ملاقات میں فلسطین کی صورتحال، مشرق وسطیٰ کی تازہ پیشرفت اور دیگر علاقائی معاملات پر بھی تبادلہ خیال کیا گیا۔
