دوشنبے (پاکستان خبر) نائب وزیراعظم اسحاق ڈار نے کہا ہے کہ شنگھائی تعاون تنظیم (ایس سی او) ڈیجیٹل تبدیلی اور پائیدار اقتصادی ترقی میں قائدانہ کردار ادا کرسکتی ہے۔ پاکستان زراعت، کان کنی، معدنیات اور انفارمیشن ٹیکنالوجی کے شعبوں میں سرمایہ کاری بڑھانے کا حامی ہے۔شنگھائی تعاون تنظیم کے اجلاس سے خطاب کرتے ہوئے اسحاق ڈار نے کہا کہ چین پاکستان اقتصادی راہداری (سی پیک) ایس سی او کے رکن ممالک کو معاشی انضمام کے مشترکہ سفر میں تیزی لانے کے مواقع فراہم کرتی ہے۔ توانائی کے شعبے میں تعاون اور عالمی معلوماتی سلامتی کو بھی تنظیم کے اہم ایجنڈے کا حصہ ہونا چاہیے۔نائب وزیراعظم نے بتایا کہ وزیراعظم محمد شہباز شریف نے شنگھائی تعاون تنظیم کی پاکستان کی صدارت کے لیے وژن پیش کیا ہے۔ ان کے مطابق تنظیم باہمی اعتماد اور تنوع کے احترام کے اصولوں پر قائم ہے، جبکہ پاکستان خطے میں رابطوں کے فروغ کے لیے ایس سی او کے ساتھ مل کر کام کرتا رہے گا۔اسحاق ڈار نے کہا کہ پاکستان شنگھائی تعاون تنظیم کے ایجنڈے پر عمل درآمد کے لیے پُرعزم ہے۔ ایس سی او کا خطہ عالمی اقتصادی ترقی کا مرکز بننے کی صلاحیت رکھتا ہے اور تنظیم نے تجارت، بنیادی ڈھانچے، ثقافت اور جدت سمیت مختلف شعبوں میں اپنا دائرہ کار وسیع کیا ہے۔انہوں نے مزید کہا کہ پاکستان کی ایس سی او میں شمولیت شنگھائی اسپرٹ سے اس کی وابستگی کا عکاس ہے۔ توانائی اور ٹرانسپورٹ کے شعبوں میں ہدفی سرمایہ کاری معاشی انضمام اور علاقائی تعاون کے فروغ کے لیے اہم ہے۔
