اسلام آباد ہائیکورٹ میں بانی پی ٹی آئی کی شفا اسپتال منتقلی درخواست پر مہلت منظور

اسلام آباد( پاکستان خبر)اسلام آباد ہائیکورٹ نے بانی پی ٹی آئی کی شفا اسپتال منتقلی سے متعلق درخواست پر رجسٹرار آفس کے اعتراضات دور کرنے کے لیے مہلت دینے کی استدعا منظور کر لی۔جسٹس انعام امین منہاس نے کیس کی سماعت کی، جبکہ درخواست گزار ڈاکٹر عظمیٰ کے وکیل عزیر بھنڈاری عدالت میں پیش ہوئے۔ وکیل نے بتایا کہ رجسٹرار آفس نے کچھ اعتراضات لگائے ہیں اور آئندہ ہفتے کیس کی سماعت کے دوران وہ اعتراضات دور کر دیں گے۔جسٹس انعام امین منہاس نے کہا کہ مختلف درخواستیں ایک ہی نوعیت کی دائر کی گئی ہیں، جس پر وکیل نے وضاحت دی کہ اس پٹیشنر کی جانب سے ایسی کوئی دوسری درخواست زیر التوا نہیں ہے۔ عدالت نے رجسٹرار آفس کو رپورٹ فراہم کرنے کی ہدایت کرتے ہوئے کیس کی سماعت ملتوی کر دی۔