اسلام آباد( پاکستان خبر)اسلام آباد ہائی کورٹ نے عمران خان کے ایکس اکاؤنٹ بند کرنے کے کیس میں پاکستان ٹیلی کمیونیکیشن اتھارٹی (پی ٹی اے) کا جواب غیر تسلی بخش قرار دے دیا ہے۔ عدالت نے بانی پاکستان تحریک انصاف سے وکیل سلمان اکرم راجا کی ملاقات نہ کروانے کے معاملے پر توہین عدالت درخواست میں تحریری جواب طلب کر لیا۔ جسٹس ارباب محمد طاہر نے ریمارکس دیے کہ آپ دیکھ لیں، رٹ پٹیشن کیا ہے اور آپ کا جواب کیا ہے۔ شہری غلام مرتضیٰ کی درخواست پر سماعت کے دوران عدالت نے کہا کہ جیل حکام، پی ٹی اے اور دیگر فریقین کو جواب موصول ہو چکا ہے، لیکن پی ٹی اے کا جواب تسلی بخش نہیں ہے۔سلمان اکرم راجا نے عدالت کو بتایا کہ بانی پی ٹی آئی سے کیس کے متعلق مشاورت کی ملاقات نہیں ہو سکی۔ جس پر عدالت نے ہدایت کی کہ اگر ملاقات ہو گئی تو 24 فروری کو حتمی دلائل سنی جائیں گی۔ عدالت نے سرکاری وکیل سے بھی تحریری جواب جمع کروانے کی ہدایت دی۔سلمان اکرم راجا نے مزید بتایا کہ ملاقات کا آرڈر 4 نومبر کا ہے، لیکن دو ماہ سے عمل درآمد نہیں ہوا۔ جسٹس ارباب محمد طاہر نے کہا کہ اس حوالے سے مناسب آرڈر جاری کیا جائے گا تاکہ ملاقات ہو اور کیس آگے بڑھ سکے۔عدالت نے کیس کی مزید سماعت 24 فروری تک ملتوی کر دی ہے۔
