اسلام آباد( پاکستان خبر)اسلام آباد ہائی کورٹ نے وفاقی دارالحکومت کے بلدیاتی انتخابات سے متعلق صدارتی آرڈیننس اور التواء کے خلاف درخواست پر وفاق اور الیکشن کمیشن کو نوٹس جاری کر کے جواب طلب کر لیا ہے۔ عدالت نے اسی نوعیت کی جماعت اسلامی کے کیس کے ساتھ درخواست کو یکجا کر دیا۔اسلام آباد ہائی کورٹ جسٹس محمد اعظم خان نے مرکزی مسلم لیگ کی درخواست پر سماعت کی، جس میں درخواست گزار انعام الرحمن کمبوہ اپنے وکیل اشفاق احمد کھرل کے ساتھ پیش ہوئے۔ وکیل نے دلائل دیتے ہوئے کہا کہ لوکل گورنمنٹ آرڈیننس کا صدارتی آرڈیننس چیلنج کیا گیا ہے اور انتخابات کرانا الیکشن کمیشن کی اولین ترجیح ہونا چاہیے۔درخواست گزار کے وکیل نے مزید کہا کہ شیڈول کا اعلان ہو چکا، کاغذات جمع کرائے جا چکے اور تمام قانونی تقاضے پورے ہونے کے باوجود انتخابات ملتوی کر دیے گئے ہیں۔ وکیل نے عدالت سے درخواست کی کہ صدراتی آرڈیننس کالعدم قرار دے کر اسلام آباد میں بلدیاتی انتخابات کرانے کا حکم دیا جائے۔عدالت نے وفاق اور الیکشن کمیشن سے جواب طلب کرتے ہوئے سماعت 27 جنوری تک ملتوی کر دی ہے۔
