اسلام آباد ہائی کورٹ میں بانی پی ٹی آئی اور بشریٰ بی بی کی سزا معطلی کی سماعت پیر تک ملتوی

اسلام آباد( پاکستان خبر) اسلام آباد ہائی کورٹ میں 190 ملین پاؤنڈ کیس میں بانی پاکستان تحریک انصاف اور بشریٰ بی بی کی سزا معطلی کی درخواستوں کی سماعت پیر تک ملتوی کر دی گئی ہے۔سماعت چیف جسٹس سرفراز ڈوگر اور جسٹس محمد آصف نے کی، جس دوران بانی پی ٹی آئی اور بشریٰ بی بی کے وکیل بیرسٹر سلمان صفدر، نیب اسپیشل پراسیکیوٹر جاوید اشرف اور رافع مقصود عدالت میں پیش ہوئے۔نیب کے اسپیشل پراسیکیوٹر نے عدالت کو بتایا کہ سزا معطلی کی درخواستیں اپیلوں پر نوٹس کے بغیر قابل سماعت نہیں، جبکہ بیرسٹر سلمان صفدر نے موقف اختیار کیا کہ سزائیں تقریباً 14 ماہ قبل دی گئی تھیں اور اس دوران پراسیکیوشن التواء کی درخواستیں دائر کرتا رہا ہے۔وکیل نے عدالت کو آگاہ کیا کہ بشریٰ بی بی ٹرائل کے دوران ضمانت پر تھیں اور میڈیکل بنیاد بھی موجود ہے، اسی لیے سزا معطلی اور ضمانت پر رہائی کی درخواست کی گئی ہے۔چیف جسٹس سرفراز ڈوگر نے کہا کہ عدالت ہفتے میں دو دن سماعت کے لیے دے سکتی ہے، جس پر سلمان صفدر نے بانی پی ٹی آئی اور بشریٰ بی بی سے ہدایات لینے کے لیے مہلت طلب کی۔عدالت نے درخواستوں پر مزید سماعت کے لیے پیر کا دن مقرر کر دیا ہے۔