تہران( مانیٹرنگ ڈیسک)ایران کی پاسدارانِ انقلاب کی قدس فورس کے سربراہ اسماعیل قانی نے اسرائیل کو جنوبی لبنان سے فوری انخلا کی وارننگ جاری کی ہے۔ایران کے سرکاری میڈیا کے مطابق انہوں نے کہا ہے کہ اگر اسرائیل نے جنوبی لبنان میں اپنی موجودگی اور کارروائیاں ختم نہ کیں تو اسے ماضی جیسے نتائج کا سامنا کرنا پڑ سکتا ہے۔اسماعیل قانی نے اپنے بیان میں کہا کہ اگر اسرائیل اپنی پالیسیوں سے باز نہ آیا تو اسے خطے سے اسی طرح نکلنا پڑے گا جیسے سال 2000 میں جنوبی لبنان سے انخلا کے دوران ہوا تھا۔انہوں نے مزید کہا کہ فیصلہ اب اسرائیل کے ہاتھ میں ہے اور اگر انخلا نہ کیا گیا تو صورتحال دوبارہ اسی تاریخ کی طرف جا سکتی ہے۔یاد رہے کہ لبنان میں ہر سال 25 مئی کو یومِ آزادی منایا جاتا ہے، جو 2000 میں اسرائیلی افواج کے جنوبی لبنان سے انخلا کی یاد میں منایا جاتا ہے۔
