افغان سرحد پر انٹیلی جنس کارروائیاں، 29 دہشت گرد ہلاک: آئی ایس پی آر

راولپنڈی (پاکستان خبر) پاکستان کی افغان سرحد پر انٹیلی جنس بنیادوں پر کی گئی کارروائیوں میں 29 دہشت گرد ہلاک ہو گئے ہیں۔پاک فوج کے شعبہ تعلقات عامہ (آئی ایس پی آر) کے مطابق آپریشن “غضب للحق” کے تحت مختلف کامیاب کارروائیاں کی گئیں۔ باجوڑ میں انٹیلی جنس بیسڈ آپریشن کے دوران 4 دہشت گرد مارے گئے، جن میں ہائی ویلیو کمانڈر خان فروش عرف زبل اور بھارتی پراکسی تنظیم جماعت الاحرار سے تعلق رکھنے والے 3 دیگر دہشت گرد شامل تھے۔آئی ایس پی آر کے مطابق جماعت الاحرار اور فتنہ الخوارج سے تعلق رکھنے والے عناصر کے خلاف پکتیا، پکتیکا اور کنڑ میں بھی کارروائیاں کی گئیں، جہاں 3 دہشت گرد مراکز تباہ کیے گئے اور 25 دہشت گرد ہلاک جبکہ متعدد زخمی ہوئے۔کارروائیوں کے دوران دہشت گردوں کے اسلحہ اور بارود کے ذخائر بھی تباہ کر دیے گئے۔آئی ایس پی آر کا کہنا ہے کہ خیبرپختونخوا، بلوچستان اور کراچی میں ہونے والے حملوں کا بھرپور جواب دیا جا رہا ہے، اور سکیورٹی فورسز نے غیر ملکی سرپرستی میں دہشت گردی کے مکمل خاتمے کے عزم کا اعادہ کیا ہے۔