اسلام آباد( پاکستان خبر)ترکیہ کے 104ویں یومِ فتح کے موقع پر آئی ایس پی آر نے پاک ترک دوستی کے جذبے سے سرشار خصوصی نغمہ ’’دو دل، ایک جان‘‘ جاری کردیا۔نغمے میں پاکستانی فنکاروں نے اردو اور ترک زبان میں اپنی آواز کا جادو جگاتے ہوئے پاکستان اور ترکیہ کے درمیان تاریخی برادرانہ تعلقات، مشترکہ ثقافت اور باہمی محبت کی خوبصورت عکاسی کی ہے۔’’دو دل، ایک جان‘‘ کی موسیقی علی مصطفیٰ نے ترتیب دی، جبکہ اس کی دھن کامران اللہ خان اور سامعہ گوہر نے مرتب کی ہے۔ نغمے کو عثمان رئیس اور ڈاکٹر مبشرہ حفیظ نے اپنی آواز سے سجایا ہے۔اس منفرد نغمے کی خاص بات یہ ہے کہ اردو اور ترک زبان کے امتزاج پر مبنی اس پیشکش میں شامل تمام گلوکار اور فنکار پاکستانی ہیں۔ نغمے میں دونوں ممالک کی مشترکہ ثقافت اور اقدار کو بھی نمایاں طور پر اجاگر کیا گیا ہے۔نغمے میں رباب، ترکیہ کے روایتی ساز باقلاما اور دربوکا کی دلکش دھنوں کو شامل کیا گیا ہے، جو پاک ترک دوستی کی خوبصورت موسیقائی عکاسی کرتی ہیں۔اردو اور ترک زبان کے حسین امتزاج سے تیار کیا گیا یہ نغمہ پاکستان اور ترکیہ کے درمیان لازوال دوستی، بھائی چارے، باہمی محبت اور مشترکہ اقدار کو بھرپور انداز میں اجاگر کرتا ہے۔
