اسرائیل کا حماس کمانڈر کو نشانہ بنانے کا دعویٰ، غزہ میں کشیدگی برقرار

غزہ ( مانیٹرنگ ڈیسک) اسرائیلی فوج نے دعویٰ کیا ہے کہ اس نے ایک فضائی کارروائی میں حماس کے ایک اہم کمانڈر کو نشانہ بنایا ہے۔اسرائیلی فوج کے مطابق شمالی غزہ میں کی گئی کارروائی کے دوران کمانڈر عماد حسن حسین اسلم کو ہدف بنایا گیا، جو مبینہ طور پر تنظیم کے اہم عسکری عہدے پر فائز تھے۔فوجی بیان میں کہا گیا ہے کہ عماد اسلم زیتون بٹالین کے کمانڈر اور غزہ سٹی بریگیڈ کے نائب سربراہ کے طور پر خدمات انجام دے رہے تھے، اور وہ متعدد کارروائیوں میں ملوث رہے ہیں۔رپورٹ کے مطابق یہ کارروائی بدھ کے روز کی گئی، تاہم حماس کی جانب سے اس دعوے پر فوری طور پر کوئی باضابطہ ردعمل سامنے نہیں آیا۔اگر اس دعوے کی آزادانہ تصدیق ہو جاتی ہے تو یہ گزشتہ دو ہفتوں میں کسی اعلیٰ کمانڈر کی ہلاکت کا تیسرا واقعہ ہوگا، جس سے خطے میں جاری کشیدگی مزید بڑھنے کا خدشہ ظاہر کیا جا رہا ہے۔