انڈونیشی پائلٹ کی شہریت پر اسرائیل نے ایتھوپین ایئرلائنز کا طیارہ واپس بھیج دیا

تل ابیب( مانیٹرنگ ڈیسک)اسرائیل نے انڈونیشیا سے تعلق رکھنے والے پائلٹ کی شہریت کے باعث ایتھوپین ایئرلائنز کے ایک کارگو طیارے کو لینڈنگ کی اجازت دینے سے روک دیا، جس کے نتیجے میں طیارے کو ایتھوپیا کے دارالحکومت ادیس ابابا واپس جانا پڑا۔میڈیا رپورٹس کے مطابق اسرائیل نے 31 ممالک کے شہری پائلٹس کے زیرِ کمان طیاروں کی لینڈنگ روکنے کے اقدامات کیے ہیں۔ تاہم اس پابندی کی نوعیت اور اس میں شامل ممالک کی فہرست کے بارے میں مزید تفصیلات سامنے نہیں آئیں۔اسرائیلی ذرائع ابلاغ کے مطابق ایتھوپین ایئرلائنز نے بعدازاں انڈونیشی پائلٹ کی جگہ دوسرے ملک سے تعلق رکھنے والے پائلٹ کو تعینات کیا، جس کے بعد کارگو طیارے نے دوبارہ تل ابیب کے لیے پرواز کی۔رپورٹس کے مطابق پائلٹ کی تبدیلی کے بعد ایتھوپین ایئرلائنز کا کارگو طیارہ تل ابیب میں بحفاظت لینڈ کر گیا۔