تل ابیب( مانیٹرنگ ڈیسک) اسرائیل کے وزیر دفاع نے خبردار کیا ہے کہ ایران کے ساتھ جاری کشیدگی دوبارہ کھلی جنگ میں تبدیل ہو سکتی ہے، اور یہ صورتحال آئندہ دو دن کے اندر بھی پیدا ہونے کا امکان ہے۔بین الاقوامی میڈیا رپورٹس کے مطابق اسرائیلی وزیر دفاع نے کہا کہ اگر اسرائیل کو اپنی قومی سلامتی کے خلاف کوئی سنگین خطرہ محسوس ہوا تو وہ کسی بیرونی منظوری کے بغیر فوری کارروائی کا حق محفوظ رکھتا ہے۔انہوں نے واضح کیا کہ اسرائیل اپنے دفاع کے لیے خود مختار فیصلے کرنے کا مکمل اختیار رکھتا ہے اور ضرورت پڑنے پر بروقت فوجی ردعمل دیا جائے گا۔یہ بیان ایسے وقت میں سامنے آیا ہے جب امریکا اور ایران کے درمیان کشیدگی کم کرنے کے لیے سفارتی کوششیں جاری ہیں اور خطے میں ممکنہ جنگ بندی اور مذاکرات کے حوالے سے مختلف سطحوں پر رابطے بھی ہو رہے ہیں۔
