دمشق( مانیٹرنگ ڈیسک) اسرائیلی جنگی طیاروں نے شام کے شمال مغربی صوبے ادلب میں ابو ظہور فضائی اڈے کو نشانہ بنایا، جس کے نتیجے میں ایئربیس کے رن وے کو نقصان پہنچا۔شامی سرکاری ٹی وی کے مطابق اسرائیلی طیاروں نے ابو ظہور ایئربیس کے رن وے پر 8 فضائی حملے کیے۔ شام کے وزیر خارجہ اسعد الشیبانی نے حملے کو بلاجواز اشتعال انگیزی قرار دیتے ہوئے اس کی شدید مذمت کی اور اسے شام کی خودمختاری کی خلاف ورزی اور علاقائی و عالمی امن کے لیے خطرہ قرار دیا۔ترکیہ کی وزارت خارجہ نے بھی اسرائیلی حملے کی مذمت کرتے ہوئے عالمی برادری سے مطالبہ کیا کہ شام کے خلاف اسرائیلی کارروائیوں میں اضافے کو روکنے کے لیے مؤثر اقدامات کیے جائیں۔برطانیہ میں قائم شامی آبزرویٹری برائے انسانی حقوق کے مطابق ابو ظہور ایئربیس پر ماضی میں غیر ملکی جنگجو قیام کرتے رہے ہیں، جبکہ شام کی اہم حامی ترکیہ اس فضائی اڈے کی بحالی کا کام کررہا تھا۔ترکیہ میں امریکی سفیر اور شام کے لیے خصوصی نمائندے ٹام بارک نے سماجی رابطے کی ویب سائٹ پر کہا کہ امریکا کو ابو ظہور ایئربیس پر اسرائیلی فضائی حملوں پر گہری تشویش ہے۔اسرائیلی وزیراعظم نیتن یاہو نے دعویٰ کیا کہ ترکیہ اس فضائی اڈے پر اپنے فوجی تعینات کررہا تھا، اسی لیے اسے نشانہ بنایا گیا۔ ان کے مطابق شام میں ترکیہ کی موجودگی اسرائیل کے لیے خطرہ ہے۔قطر، مصر اور دیگر علاقائی ممالک نے بھی اسرائیلی حملے کی مذمت کی ہے۔
