مصنوعی ذہانت سے ہفتے میں تین دن کام، آمدنی میں اضافے کی جیف بیزوز کی پیشگوئی

نیویارک( ویب ڈیسک) معروف کاروباری شخصیت اور ایمازون کے بانی جیف بیزوز نے پیشگوئی کی ہے کہ مصنوعی ذہانت کی ترقی مستقبل میں لوگوں کے اوقاتِ کار کم کرنے اور آمدنی بڑھانے کا ذریعہ بن سکتی ہے۔امریکی نشریاتی ادارے کو انٹرویو دیتے ہوئے جیف بیزوز نے کہا کہ جدید ٹیکنالوجی کی مدد سے افراد روزانہ چند گھنٹے کام کرکے بھی اپنے خاندان کی ضروریات پوری کرنے کے لیے مناسب آمدنی حاصل کرسکیں گے۔ان کے مطابق مستقبل میں لوگ ہفتے میں صرف تین دن کام کرکے بھی خاطر خواہ کمائی کرسکیں گے، جبکہ ایک فرد کی آمدنی پورے خاندان کے اخراجات پورے کرنے کے لیے کافی ہوسکتی ہے۔جیف بیزوز نے کہا کہ مصنوعی ذہانت کاروباری اداروں کو کم وسائل استعمال کرتے ہوئے زیادہ مصنوعات تیار کرنے کے قابل بنائے گی، جس سے پیداوار اور کارکردگی میں اضافہ ہوگا۔انہوں نے مصنوعی ذہانت کو ملازمتوں کے لیے محض خطرہ قرار دینے کے بجائے اس ٹیکنالوجی سے بہتر معیارِ زندگی اور کام کے بوجھ میں کمی کی امید ظاہر کی۔