کراچی ( پاکستان خبر) اپیلٹ کاؤنسل لوکل گورنمنٹ کے چیئرمین و جج سہیل جبار ملک کے چیمبر سے ایک دھمکی آمیز لفافہ برآمد ہونے کا انکشاف ہوا ہے۔لفافے کے اندر موجود پرچی پر "جج تیرا تحفہ" درج تھا جبکہ اس کے ساتھ نائن ایم ایم کی گولی بھی رکھی گئی تھی، جسے نامعلوم افراد کی جانب سے سنگین دھمکی قرار دیا جا رہا ہے۔واقعے کے بعد ڈسٹرکٹ اینڈ سیشن جج اپیلٹ کاؤنسل لوکل گورنمنٹ کے پرائیویٹ سیکریٹری نے آرام باغ تھانہ میں مقدمہ درج کرا دیا ہے، جس میں انسداد دہشت گردی کی دفعات بھی شامل کی گئی ہیں۔ذرائع کے مطابق سہیل جبار ملک ماضی میں انسداد دہشت گردی کی خصوصی عدالت میں خدمات انجام دے چکے ہیں اور صوبہ سندھ میں دہشت گردی کی مالی معاونت سے متعلق اہم مقدمات کی سماعت بھی کر چکے ہیں، جہاں انہوں نے کالعدم تنظیموں کے کارندوں کو سزائیں سنائی تھیں۔واقعے کے بعد سیکیورٹی خدشات میں اضافہ ہو گیا ہے جبکہ پولیس حکام کے مطابق یہ واضح نہیں ہو سکا کہ لفافہ چیمبر میں کس نے رکھا، تاہم واقعے کی تحقیقات جاری ہیں۔
