اسلام آباد( کامرس ڈیسک) کراچی پورٹ نے عالمی بحری رابطہ کاری کے اشاریے میں نمایاں بہتری حاصل کرلی، جس کا رابطہ اشاریہ 2026 کی دوسری سہ ماہی میں 309 سے بڑھ کر 343 کی بلند ترین سطح پر پہنچ گیا۔اعداد و شمار کے مطابق پاکستان عالمی بحری رابطہ کاری کی درجہ بندی میں 34ویں نمبر پر آگیا ہے۔ پورٹ لائنر شپنگ رابطہ کاری اشاریہ دنیا بھر کی تقریباً 900 بندرگاہوں کے اعداد و شمار کی بنیاد پر عالمی بحری روابط کا جائزہ لیتا ہے۔کراچی پورٹ کی بہتر رابطہ کاری سے پاکستان کے عالمی بحری نقل و حمل کے نظام میں روابط مضبوط ہونے کے ساتھ عالمی منڈیوں تک رسائی، تجارت اور برآمدی مواقع میں اضافے کی راہ بھی ہموار ہو رہی ہے۔کراچی پورٹ کی اس پیش رفت کو وزیراعظم کی قائم کردہ ٹاسک فورس کی بحری اصلاحات اور حکومتی اقدامات کے نتائج سے بھی منسلک کیا گیا ہے۔
