کراچی( کامرس ڈیسک)کراچی پورٹ ٹرسٹ (کے پی ٹی) نے مالی سال 2025-26 کے دوران اپنی کارکردگی میں نمایاں بہتری کا مظاہرہ کرتے ہوئے کارگو، کنٹینرز اور جہازوں کی ہینڈلنگ کے نئے ریکارڈ قائم کر دیے ہیں۔کے پی ٹی کی سالانہ رپورٹ کے مطابق رواں مالی سال کے دوران بندرگاہ سے مجموعی طور پر 55.44 ملین ٹن کارگو کی ترسیل ہوئی، جو گزشتہ مالی سال کے 53.95 ملین ٹن کے مقابلے میں 2.76 فیصد زیادہ ہے۔ اس اضافے کی بنیادی وجہ درآمدی سرگرمیوں میں اضافہ رہا، جبکہ برآمدات میں معمولی کمی ریکارڈ کی گئی۔رپورٹ کے مطابق مالی سال 2025-26 میں درآمدی کارگو 35.91 ملین ٹن رہا، جو گزشتہ سال کے مقابلے میں 5.82 فیصد زیادہ ہے۔ درآمدات میں اضافے کی بڑی وجہ ڈرائی بلک کارگو میں 66.8 فیصد اور لیکوئڈ بلک کارگو میں 4.99 فیصد اضافہ بتایا گیا ہے۔دوسری جانب برآمدی کارگو 20.01 ملین ٹن سے کم ہو کر 19.53 ملین ٹن رہ گیا، جو 2.44 فیصد کمی کو ظاہر کرتا ہے۔ برآمدات میں کمی کی وجہ ڈرائی جنرل کارگو کی ترسیل میں کمی رہی، تاہم لیکوئڈ بلک برآمدات میں 17.36 فیصد اضافہ دیکھا گیا۔کے پی ٹی کے مطابق درآمدات اور برآمدات کے درمیان فرق بڑھ کر 16.4 ملین ٹن ہو گیا ہے، جو ملک کے تجارتی خسارے کی عکاسی کرتا ہے۔رپورٹ میں بتایا گیا کہ کنٹینر سیکٹر میں بھی نئی بلند ترین سطح حاصل کی گئی، جہاں رواں سال 2.75 ملین ٹی ای یوز (TEUs) کنٹینرز ہینڈل کیے گئے، جو گزشتہ سال کے مقابلے میں 3.67 فیصد زیادہ ہیں۔درآمدی کنٹینرز کی تعداد 4.28 فیصد اضافے کے ساتھ 1.422 ملین ٹی ای یوز جبکہ برآمدی کنٹینرز 3.03 فیصد اضافے کے ساتھ 1.327 ملین ٹی ای یوز ریکارڈ کیے گئے۔
