اسلام آباد( کامرس ڈیسک)ملک میں پیٹرول اور ڈیزل کی قیمتوں میں کمی کے بعد مٹی کے تیل کی قیمت میں بھی نمایاں کمی کر دی گئی ہے۔وفاقی حکومت کی جانب سے جاری نوٹیفکیشن کے مطابق مٹی کے تیل کی فی لیٹر قیمت میں 48 روپے 29 پیسے کی کمی کی گئی ہے، جس کے بعد نئی قیمت 233 روپے 90 پیسے فی لیٹر مقرر کر دی گئی ہے۔ یہ کمی فوری طور پر نافذ العمل ہو چکی ہے۔اس سے قبل مٹی کے تیل کی فی لیٹر قیمت 282 روپے 19 پیسے تھی، تاہم حالیہ کمی کے بعد عوام کو براہِ راست ریلیف حاصل ہوگا۔واضح رہے کہ اس سے ایک روز قبل بھی پیٹرول کی قیمت میں 74 روپے اور ڈیزل کی قیمت میں 67 روپے فی لیٹر کمی کا اعلان کیا گیا تھا، جس سے ملک بھر میں عوامی ریلیف کے تسلسل کا اظہار ہو رہا ہے۔
