اسلام آباد(پاکستان خبر)پاکستان تحریک انصاف کے چیئرمین بیرسٹر گوہر علی نے کہا ہے کہ خیبرپختونخوا کا مکمل سالانہ بجٹ 19 جون کو پیش کرنے کا فیصلہ کر لیا گیا ہے۔نجی ٹی وی سے گفتگو کرتے ہوئے انہوں نے بتایا کہ وزیراعلیٰ سہیل آفریدی کو مکمل بجٹ پیش کرنے کے لیے گرین سگنل دے دیا گیا ہے اور امید ہے کہ تمام اراکین اسمبلی بجٹ اجلاس میں شرکت کریں گے۔بیرسٹر گوہر نے کہا کہ صوبائی بجٹ کی منظوری کے لیے تمام اراکین اسمبلی وزیراعلیٰ کا بھرپور ساتھ دیں گے۔ ان کے مطابق پارٹی کی خواہش تھی کہ بجٹ پیش کرنے سے قبل بانی پاکستان تحریک انصاف عمران خان سے مشاورت کی جائے۔انہوں نے کہا کہ بجٹ سے متعلق مشاورت کے لیے عمران خان سے ملاقات کی اجازت نہیں دی گئی، تاہم ایسا کوئی فیصلہ نہیں کیا جائے گا جس سے خیبرپختونخوا کے مفادات کو نقصان پہنچے۔چیئرمین تحریک انصاف نے مزید کہا کہ عوامی مفاد، صوبے کی ترقی اور مالی استحکام کو مدنظر رکھتے ہوئے بجٹ پیش کیا جائے گا، تاکہ صوبے کے عوام کو زیادہ سے زیادہ سہولیات فراہم کی جا سکیں۔
