پشاور( پاکستا ن خبر) خیبر پختونخوا کے ضلع کوہاٹ میں پشاور روڈ پر واقع پرانی پولیس لائنز میں نماز جمعہ کے دوران دھماکے اور فائرنگ کے واقعے میں 5 پولیس اہلکاروں سمیت 16 افراد شہید ہوگئے، جبکہ 40 سے زائد افراد زخمی ہوئے ہیں۔ریسکیو 1122 کے ترجمان بلال احمد فیضی کے مطابق دھماکے کے فوراً بعد امدادی ٹیموں نے جائے وقوعہ پر سرچ اور ریسکیو کارروائی شروع کردی۔ زخمیوں کو ابتدائی طبی امداد دینے کے بعد ایمبولینسوں کے ذریعے اسپتال منتقل کیا جا رہا ہے۔ریسکیو آپریشن میں معاونت کے لیے کرک اور ہنگو سے بھی اضافی ایمبولینسیں اور اہلکار کوہاٹ پہنچ گئے ہیں۔ حکام کے مطابق 20 ایمبولینسوں، ریسکیو و ریکوری گاڑیوں سمیت 60 سے زائد اہلکار امدادی کارروائیوں میں مصروف ہیں۔ابتدائی اطلاعات کے مطابق دھماکے کے بعد 7 مسلح دہشت گردوں نے پولیس لائنز میں داخل ہونے کی کوشش کی، جس پر پولیس اور سی ٹی ڈی اہلکاروں نے ان کا مقابلہ کیا۔ کارروائی کے دوران ایک دہشت گرد نشانہ باز سمیت 6 دہشت گرد ہلاک کیے جا چکے ہیں۔حکام کے مطابق پولیس لائنز کے احاطے میں کلیئرنس آپریشن جاری ہے اور کارروائی آخری مرحلے میں داخل ہوگئی ہے۔آئی جی خیبر پختونخوا ذوالفقار حمید نے کہا ہے کہ پولیس دہشت گردوں کا مقابلہ کرنے کی بھرپور صلاحیت رکھتی ہے، جبکہ فتنہ الخوارج کے مکمل خاتمے تک کارروائیاں جاری رہیں گی۔
