خیبرپختونخوا حکومت کا صحافیوں کی فلاح و بہبود کیلئے بڑے مالی پیکیج اور نئی پریس کلب عمارت کا اعلان

پشاور( پاکستا ن خبر) خیبرپختونخوا حکومت نے صحافیوں کی فلاح و بہبود اور میڈیا کے شعبے کی بہتری کے لیے اہم اقدامات کا اعلان کیا ہے۔ وزیراعلیٰ نے پشاور پریس کلب کی نئی عمارت کی جلد سنگِ بنیاد رکھنے اور صحافیوں کے لیے علیحدہ انڈوومنٹ فنڈ کے قیام پر اصولی اتفاق کیا ہے۔وزیراعلیٰ نے کہا کہ حکومت آزاد، ذمہ دار اور خودمختار صحافت کے فروغ کے ساتھ صحافیوں کو محفوظ اور سازگار ماحول فراہم کرنے کے لیے عملی اقدامات کر رہی ہے۔انہوں نے بتایا کہ مالی سال 2026-27 کے بجٹ میں کارکن صحافیوں کے لیے بلاسود قرضوں کی فراہمی کی مد میں ایک ارب روپے مختص کیے گئے ہیں، جبکہ میڈیا کالونیز کے قیام کے لیے فزیبلٹی اور ڈیزائن پر 50 کروڑ روپے رکھے گئے ہیں۔ان کے مطابق پشاور پریس کلب کی نئی عمارت کے لیے 15 کروڑ روپے، صوبے بھر کے ضلعی پریس کلبوں کی بحالی کے لیے 30 کروڑ روپے اور انفارمیشن سیکٹر میں جدت و ترقی کے لیے 10 کروڑ روپے مختص کیے گئے ہیں۔وزیراعلیٰ نے مزید بتایا کہ خیبرپختونخوا جرنلسٹس ویلفیئر انڈوومنٹ فنڈ کو 20 کروڑ روپے سے بڑھا کر 50 کروڑ روپے کر دیا گیا ہے۔انہوں نے متعلقہ حکام کو ہدایت کی کہ میڈیا اداروں کو جاری کیے جانے والے سرکاری اشتہارات کی ادائیگی کو کارکن صحافیوں کے واجبات اور کم از کم اجرت کی ادائیگی سے مشروط بنایا جائے۔ ان کے مطابق میڈیا کی ترقی کے ساتھ ساتھ صحافیوں کے حالاتِ کار اور فلاح و بہبود حکومت کی ترجیح ہے۔وزیراعلیٰ نے نیو پشاور ویلی سٹی میڈیا انکلیو منصوبے پر صحافیوں کو اعتماد میں لے کر قواعد کے مطابق پیش رفت یقینی بنانے کی بھی ہدایت کی، جبکہ صحافیوں کے مطالعاتی دوروں کے انعقاد کی ہدایت بھی جاری کی گئی۔اس موقع پر پشاور پریس کلب کے جنرل سیکرٹری نے وزیراعلیٰ کو پریس کلب کے دورے اور نئی عمارت کا سنگِ بنیاد رکھنے کی دعوت دی۔