خیبرحکومت کا پشاور ناردرن بائی پاس کی تکمیل کے لیے 3.9 ارب روپے فراہم کرنے کا اعلان

پشاور( پاکستان خبر) خیبرپختونخوا حکومت نے پشاور ناردرن بائی پاس منصوبے کی جلد تکمیل کے لیے 3.9 ارب روپے فراہم کرنے کا فیصلہ کیا ہے۔وزیراعلی خیبرپختونخوا محمد سہیل آفریدی کی زیر صدارت اجلاس میں منصوبے کی پیشرفت کا جائزہ لیا گیا۔ اجلاس میں فیصلہ کیا گیا کہ بائی پاس پر دو انڈر پاسز اور ایک پل کی تعمیر کے لیے ایک ارب روپے صوبائی حکومت فراہم کرے گی۔ این ایچ اے حکام نے یقین دہانی کرائی کہ منصوبہ جون 2026 تک مکمل ہو جائے گا۔وزیراعلی سہیل آفریدی نے کہا کہ وفاقی حکومت کی جانب سے ناکافی فنڈنگ کے باعث یہ منصوبہ 2010 سے تاخیر کا شکار رہا، اور اس کے مکمل نہ ہونے سے خیبرپختونخوا کے ترقیاتی منصوبے سست روی کا شکار ہیں۔ انہوں نے کہا کہ منصوبہ عوامی مفاد کے لیے اہم ہے اور اس کی تکمیل سے نہ صرف سفر میں سہولت آئے گی بلکہ تجارتی سرگرمیوں کو بھی فروغ ملے گا۔اجلاس میں منصوبے پر اب تک 23.5 ارب روپے خرچ ہونے، مجموعی فنانشل پراگریس 85.6 فیصد، پیکج ون پر 100 فیصد، پیکج ٹو پر 64 فیصد، پیکج تھری پر 86.6 فیصد اور پیکج تھری اے پر 69 فیصد فزیکل پراگریس مکمل ہونے کی رپورٹ بھی پیش کی گئی۔اجلاس میں مشیر خزانہ مزمل اسلم، ممبر نیشنل ہائی ویز، کمشنر پشاور اور متعلقہ صوبائی محکموں کے حکام نے بھی شرکت کی۔