پشاور( پاکستان خبر) گورنر خیبرپختونخوا فیصل کریم کنڈی نے ضلع ٹانک کے علاقے مانجھی خیل میں قائم چیک پوسٹ پر ہونے والے حملے کا نوٹس لیتے ہوئے متعلقہ اعلیٰ حکام سے واقعے کی تفصیلی رپورٹ طلب کر لی۔گورنر خیبرپختونخوا نے حملے کی شدید مذمت کرتے ہوئے اسے ملک دشمن عناصر کی بزدلانہ کارروائی قرار دیا۔ انہوں نے کہا کہ واقعے میں ہونے والی شہادتوں پر پوری قوم افسردہ ہے اور شہداء کی قربانیوں کو ہمیشہ یاد رکھا جائے گا۔فیصل کریم کنڈی نے متعلقہ حکام کو ہدایت کی کہ حملے میں زخمی ہونے والے سیکیورٹی اہلکاروں کو بہترین طبی سہولیات فراہم کی جائیں تاکہ ان کے علاج میں کسی قسم کی کمی نہ رہ جائے۔انہوں نے شہداء کے اہل خانہ سے دلی ہمدردی اور تعزیت کا اظہار کرتے ہوئے کہا کہ وہ اس مشکل وقت میں غمزدہ خاندانوں اور شہید اہلکاروں کے اہل خانہ کے ساتھ کھڑے ہیں۔گورنر خیبرپختونخوا نے شہداء کے درجات کی بلندی، زخمیوں کی جلد صحت یابی اور ملک میں امن و استحکام کے لیے دعا بھی کی۔
