لاہور چیمبر انتخابات، ویژن الائنس نے ایسوسی ایٹ کلاس کی تمام نشستیں جیت لیں

لاہور ( کامرس ڈیسک) لاہور چیمبر آف کامرس اینڈ انڈسٹری کے ایسوسی ایٹ کلاس انتخابات میں ویژن الائنس نے تمام 15 نشستیں جیت کر کلین سویپ کرلیا۔ایسوسی ایٹ کلاس کے مجموعی 19 ہزار 87 ووٹوں میں سے 9 ہزار 728 ووٹ کاسٹ ہوئے، ویژن الائنس نے 4 ہزار 523 پینل ووٹس حاصل کیے جبکہ پی پی بی اے الائنس 3 ہزار 470 پینل ووٹس کے ساتھ دوسرے نمبر پر رہا۔پیاف میاں شفقت گروپ کو 39 پینل ووٹس ملے، 310 ووٹ منسوخ ہوئے جبکہ 1386 سپلٹ ووٹ ڈالے گئے۔اس سے ایک روز قبل کارپوریٹ کلاس کے انتخابات میں بھی ویژن الائنس نے 15 میں سے 13 نشستیں جیتی تھیں جبکہ پی پی بی اے الائنس کے 2 امیدوار کامیاب ہوئے تھے۔ یوں 30 ایگزیکٹو کمیٹی ارکان کے مرحلہ وار انتخابات میں ویژن الائنس کے 28 اور پی پی بی اے الائنس کے 2 امیدوار کامیاب ہوئے۔ویژن الائنس کے رہنما خواجہ شاہ زیب اکرم نے کامیابی پر لاہور کی بزنس کمیونٹی کا شکریہ ادا کرتے ہوئے کہا کہ تاجر برادری سے کیے گئے وعدے پورے کریں گے اور تاجروں کے مسائل کے حل کیلئے کردار ادا کریں گے۔نومنتخب صدر علی حسام اصغر، سینئر نائب صدر اور نائب صدر یکم اکتوبر سے اپنے عہدوں کا چارج سنبھالیں گے۔وزیراعلیٰ پنجاب مریم نواز نے بھی ویژن الائنس کے رہنما علی حسام اصغر اور دیگر کامیاب امیدواروں کیلئے نیک تمناؤں کا اظہار کرتے ہوئے امید ظاہر کی کہ لاہور چیمبر کے عہدیداران صنعت و تجارت کے فروغ میں حکومت پنجاب کے ساتھ تعاون کریں گے۔