کائنات کا سب سے بڑا رنگین نقشہ تیار، 4 ارب خلائی اجرام کی تفصیلات شامل

نیو یارک( مانیٹرنگ ڈیسک)ماہرینِ فلکیات نے کائنات کا اب تک کا سب سے بڑا دو بُعدی رنگین نقشہ جاری کردیا، جس میں تقریباً 4 ارب ستاروں، کہکشاؤں اور دیگر خلائی اجسام کا ڈیٹا شامل ہے۔یہ غیر معمولی نقشہ ڈیسی لیگیسی امیجنگ سرویز کی ٹیم نے تیار کیا ہے، جس میں 5.6 کھرب پکسلز موجود ہیں۔ اس کا ڈیٹا عام افراد، ماہرینِ فلکیات اور شہری سائنس دانوں کے لیے بھی دستیاب ہے، جسے آن لائن لیگیسی سروے اسکائی ویور کے ذریعے دیکھا جاسکتا ہے۔سائنس دانوں کے مطابق نئی تصویر کی مدد سے خلاء میں موجود نایاب مظاہر کا سراغ لگانے میں آسانی ہوگی، جن میں ثقلی عدسہ کاری اور مختصر عرصے کے لیے ظاہر ہونے والے واقعات، بالخصوص سپرنووا شامل ہیں۔نقشے کی مدد سے ماہرین کائنات کے دو بڑے معموں، تاریک مادّے اور تاریک توانائی، کو سمجھنے کی کوشش بھی کرسکیں گے۔ تاریک مادّہ کائنات کے بیشتر مادّے کی کمیت کا حامل سمجھا جاتا ہے، جبکہ تاریک توانائی کائنات کے تیزی سے پھیلاؤ میں بنیادی کردار ادا کرتی ہے۔نیا نقشہ ڈیسی لیگیسی امیجنگ سرویز کے سابقہ مشاہداتی اعداد و شمار پر مبنی ہے، جو پہلے ہی فلکیاتی تحقیق میں نمایاں اہمیت حاصل کرچکے ہیں۔ اب تک 1800 سے زیادہ سائنسی مقالوں میں ان اعداد و شمار سے استفادہ یا ان کا حوالہ دیا جاچکا ہے۔لیگیسی سرویز کے شریک سربراہ اور امریکی لارنس برکلے قومی تجربہ گاہ کے سائنس دان ڈیوڈ شلیگل کے مطابق یہ معلومات فلکیاتی تحقیق کا اہم ذریعہ بن چکی ہیں اور ماہرین کسی خلائی جرم پر تحقیق شروع کرنے سے پہلے اکثر لیگیسی امیجنگ ویوور پر اس کا جائزہ لیتے ہیں۔ماہرین کا کہنا ہے کہ نئی نقشہ سازی سے کائنات کے وسیع ڈھانچے، اربوں خلائی اجسام اور اس کے بنیادی رازوں کو سمجھنے کے لیے تحقیق کے نئے راستے کھل گئے ہیں۔