لاہور ( سپورٹس ڈیسک)ہیڈنگلے ٹیسٹ میں انگلینڈ سے اننگز اور 103 رنز کی شکست کے بعد پاکستان نے لارڈز میں ہونے والے دوسرے ٹیسٹ کیلئے محمد رضوان اور سلمان علی آغا کو ٹیم میں برقرار رکھنے کا فیصلہ کیا ہے۔ٹیم انتظامیہ کی جانب سے سابق کپتان اور تجربہ کار وکٹ کیپر محمد رضوان کو آرام دینے اور غازی غوری کو ٹیسٹ ڈیبیو کرانے کی قیاس آرائیاں کی جارہی تھیں، جبکہ سلمان علی آغا کو بھی ٹیم سے باہر کیے جانے کا امکان ظاہر کیا گیا تھا۔تاہم اطلاعات کے مطابق دونوں سینئر کھلاڑی جمعرات سے لارڈز میں شروع ہونے والے دوسرے ٹیسٹ کیلئے 11 رکنی ٹیم کا حصہ ہوں گے۔ 34 سالہ محمد رضوان اب تک 46 ٹیسٹ جبکہ 32 سالہ سلمان علی آغا 28 ٹیسٹ کھیل چکے ہیں۔بابر اعظم کی ایک میچ کی غیر حاضری کے بعد واپسی پر 30 سالہ سعود شکیل کو ٹیم سے باہر کیا جائے گا۔ انہوں نے لیڈز ٹیسٹ میں 5 اور 14 رنز بنائے تھے۔
