اسلام آباد( پاکستان خبر) قومی اسمبلی کے اجلاس میں اسپیکر سردار ایاز صادق نے محمود خان اچکزئی کو اپوزیشن لیڈر مقرر کرنے کا اعلان کر دیا۔ اجلاس اسپیکر کی صدارت میں شروع ہوا، جس کے آغاز میں اسپیکر نے کہا کہ آج وقفہ سوالات نہیں ہوگا۔ اس موقع پر اسپیکر نے چیف وہپ کو اپوزیشن لیڈر کے نوٹیفکیشن کے لیے اپنے چیمبر میں بلا لیا اور کہا کہ عامر ڈوگر میرے چیمبر آئیں، آپ کو نوٹیفکیشن دینا ہے۔ بعد ازاں انہوں نے باضابطہ طور پر محمود خان اچکزئی کو اپوزیشن لیڈر بنانے کا اعلان کر دیا۔اجلاس کے دوران وزیر قانون اعظم نذیر تارڑ نے پاکستان نرسنگ کونسل آرڈیننس قومی اسمبلی میں پیش کیا۔ اس کے علاوہ ایکسپورٹ ڈویلپمنٹ فنڈ ترمیمی بل 2026، درآمدات و برآمدات ایکٹ ترمیمی بل، پاکستان ٹیلی کمیونیکیشن تنظیم نو ترمیمی بل، اور لائف انشورنس نیشنل لائیزیشن ترمیمی بل بھی ایوان میں پیش کیے گئے۔وزیر قانون نے برآمدی ترقی فنڈ ترمیمی بل 2026، ایکسپورٹ امپورٹ بینک آف پاکستان ترمیمی بل 2026، پاکستان ٹیلی مواصلات تنظیم نو ترمیمی بل، فیڈرل بورڈ آف انٹرمیڈیٹ اینڈ سیکنڈری ایجوکیشن ترمیمی بل، متبادل تنازعاتی تصفیہ ترمیمی بل اور اسلام آباد کے علاقائی ملکیت و انتظام بل بھی قومی اسمبلی میں پیش کیے۔بعد ازاں چیئرمین پی ٹی آئی بیرسٹر گوہر کی قیادت میں پارٹی کا وفد اسپیکر آفس پہنچا۔ اس موقع پر بیرسٹر گوہر نے کہا کہ اسپیکر نے آج بلایا تھا اور ہم نوٹیفکیشن لینے جا رہے ہیں۔ انہوں نے مزید کہا کہ اپوزیشن لیڈر کی نشست 7 اگست سے خالی تھی اور یہ ہمارا قانونی حق تھا۔
