کراچی( کامر س ڈیسک) پاکستان میں ساحلی علاقے کے قریب ہائیڈرو کاربن پلے کی پہلی کامیاب دریافت سامنے آگئی ہے، جسے ملک میں تیل و گیس کی تلاش کے شعبے میں اہم پیش رفت قرار دیا جا رہا ہے۔پاکستان پیٹرولیم لمیٹڈ (پی پی ایل) کے مطابق ضلع سجاول، سندھ میں کمپنی کے زیرِ انتظام سرانی بلاک کے دریافتی کنویں ’’ڈولفن‘‘ سے گیس کا اہم اور منفرد ذخیرہ دریافت ہوا ہے۔پی پی ایل کے مطابق یہ لوئر انڈس بیسن کی جراسک دور کی چلتن فارمیشن سے ہائیڈرو کاربن کی پہلی دریافت ہے۔کمپنی کا کہنا ہے کہ اس دریافت سے علاقے میں پیٹرولیم سسٹم کی موجودگی ثابت ہوگئی ہے، جبکہ خشکی کے دلدلی علاقوں اور ممکنہ کم گہرے سمندری توسیعی حصوں میں تیل و گیس کی مزید تلاش کے لیے نئی راہیں کھل گئی ہیں۔
