نیو یارک (کامرس ڈیسک) وفاقی وزیر خزانہ محمد اورنگزیب اور مائیکروسافٹ کے بانی اور گیٹس فاؤنڈیشن کے شریک چیئرمین بل گیٹس کے درمیان پائیدار ترقی کے اہداف کے حصول کے لیے باہمی تعاون کو مزید مضبوط بنانے پر اتفاق ہوا ہے۔وزارت خزانہ کے مطابق یہ ملاقات سوئٹزرلینڈ کے شہر ڈیووس میں عالمی اقتصادی فورم کے 26ویں سالانہ اجلاس کے موقع پر ہوئی، جس میں پاکستان میں جاری اصلاحاتی عمل اور صحت کے شعبے کی ترجیحات پر تفصیلی تبادلہ خیال کیا گیا۔بیان میں کہا گیا ہے کہ دونوں رہنماؤں نے پائیدار ترقی کے اہداف کے حصول کے لیے گیٹس فاؤنڈیشن کے ساتھ شراکت داری کو مزید وسعت دینے پر اتفاق کیا۔وفاقی وزیر خزانہ نے پاکستان میں گیٹس فاؤنڈیشن کی طویل عرصے سے جاری معاونت کو سراہتے ہوئے پولیو کے خاتمے میں اس کے کلیدی کردار پر شکریہ ادا کیا۔ انہوں نے صحتِ عامہ کے چیلنجز سے نمٹنے اور طبی سہولیات کی بہتری کے لیے مسلسل تعاون کو اہم قرار دیا۔بل گیٹس نے اس موقع پر پاکستان میں گیٹس فاؤنڈیشن کی موجودہ اور آئندہ سرگرمیوں سے آگاہ کیا اور تعاون جاری رکھنے کے عزم کا اعادہ کیا۔ انہوں نے پولیو کے مکمل خاتمے کے لیے مستقل اور مربوط کوششوں کی ضرورت پر بھی زور دیا۔بل گیٹس کا کہنا تھا کہ مؤثر اور شفاف ٹیکس نظام طویل المدتی معاشی خود انحصاری کے لیے نہایت اہم ہے۔ملاقات کے دوران صحت کے شعبے میں تعاون کے مزید امکانات پر بھی گفتگو کی گئی، جن میں مقامی سطح پر ویکسین کی تیاری اور سپلائی چین کو مضبوط بنانے کے امور شامل تھے۔ وزارت خزانہ کے مطابق متعلقہ وزارتوں اور شراکت داروں کے ساتھ مشاورت جاری رکھنے پر بھی اتفاق کیا گیا۔
