اسلام آباد( ویب ڈیسک) موبائل صارفین کے لیے اہم خبر سامنے آ گئی ہے، جہاں موبائل کمپنیوں نے پاکستان ٹیلی کمیونیکیشن اتھارٹی (پی ٹی اے) کی منظوری کے بعد کال اور انٹرنیٹ پیکجز کے نرخ بڑھا دیے ہیں۔نئے ٹیرف کے مطابق موبائل پیکجز کی قیمتوں میں سالانہ بنیادوں پر تقریباً 19 سے 33 فیصد تک اضافہ کیا گیا ہے، جبکہ مختلف ماہانہ کال اور ڈیٹا پیکجز پہلے کے مقابلے میں 500 روپے تک مہنگے ہو گئے ہیں۔تفصیلات کے مطابق 15 روزہ کال اور ڈیٹا پیکجز کے نرخوں میں 300 روپے تک اضافہ کیا گیا، جبکہ ہفتہ وار ہائبرڈ پیکجز بھی 130 روپے تک مہنگے کر دیے گئے ہیں۔اسی طرح تین روزہ پیکجز کی قیمتوں میں 21 روپے، دو روزہ پیکجز میں 20 روپے اور ایک روزہ ہائبرڈ پیکجز میں 5 روپے تک اضافہ کر دیا گیا ہے۔پی ٹی اے کی ویب سائٹ پر 15 ہائبرڈ اور ڈیٹا پیکجز کے نئے نرخ جاری کر دیے گئے ہیں، جن میں مختلف موبائل کمپنیوں کے پیکجز کی قیمتیں، مدت، سہ ماہی نرخ اور صارفین کو دستیاب سہولیات کی تفصیلات شامل ہیں۔نئے نرخ لاگو ہونے کے بعد موبائل صارفین کو کالز اور انٹرنیٹ سروسز کے استعمال کے لیے پہلے کے مقابلے میں زیادہ اخراجات برداشت کرنا ہوں گے۔
