لاہور (پاکستان خبر) وزیراعلیٰ پنجاب مریم نواز شریف نے کہا ہے کہ 8 اکتوبر 2005 کے تباہ کن زلزلے کے متاثرین کا دکھ آج بھی محسوس ہوتا ہے۔21ویں قومی یومِ استقامت کے موقع پر اپنے پیغام میں مریم نواز نے زلزلے میں جاں بحق افراد کو خراجِ عقیدت پیش کرتے ہوئے کہا کہ پاکستانی قوم کی ہمدردی، ایثار اور احساس کا جذبہ اس مشکل گھڑی میں ناقابلِ فراموش رہا۔انہوں نے کہا کہ زلزلوں اور سیلاب جیسی قدرتی آفات کے دوران عوام کا اتحاد، یکجہتی، ثابت قدمی اور حوصلہ قومی کردار کی عکاسی کرتا ہے، جبکہ پاک فوج، پاک بحریہ، پاک فضائیہ، ریسکیو 1122، پولیس اور دیگر اداروں کی خدمات قابلِ تحسین ہیں۔وزیراعلیٰ پنجاب نے کہا کہ قدرتی آفات سے نمٹنے کیلئے اداروں کی بروقت تیاری ضروری ہے، جبکہ موسمیاتی تبدیلی کے باعث سیلاب، زلزلوں اور اسموگ سے نمٹنے کیلئے مؤثر پالیسی اور پائیدار اقدامات ناگزیر ہیں۔مریم نواز کے مطابق پنجاب نے تاریخ کے سب سے بڑے سیلاب کا سامنا کرتے ہوئے وسیع ریسکیو، ریلیف اور انخلا آپریشن کیا، جس کے دوران لاکھوں انسانی جانوں اور مویشیوں کو بچایا گیا۔انہوں نے کہا کہ عوام کو قدرتی آفات سے محفوظ رکھنے کیلئے پنجاب کے تمام ادارے مسلسل متحرک ہیں اور پنجاب ڈیزاسٹر مینجمنٹ اتھارٹی کو جدید تقاضوں سے ہم آہنگ کیا گیا ہے۔
