لاہور( پاکستان خبر) وزیراعلیٰ پنجاب مریم نواز شریف نے آٹزم ڈے کے موقع پر آٹزم میں مبتلا بچوں کی تعلیم، تربیت اور بحالی کے لیے اپنا عزم دہرایا۔اپنے خصوصی پیغام میں انہوں نے آٹزم کے شکار افراد کے حقوق، معاشرتی شمولیت اور مساوی مواقع پیدا کرنے پر زور دیا اور متاثرہ بچوں کی بحالی کے لیے مؤثر عملی اقدامات کرنے کا عہد کیا۔وزیراعلیٰ نے پاکستان کے پہلے سرکاری آٹزم سنٹر کے قیام پر اظہار تشکر کیا اور معاون خصوصی ثانیہ عاشق اور ٹیم کو خراج تحسین پیش کیا۔مریم نواز شریف نے کہا کہ لاہور میں قائم سکول آف آٹزم دنیا میں اپنی نوعیت کا منفرد ادارہ ہے، جہاں ابتدائی مرحلے میں ایرلی آٹزم کی تشخیص کی سہولت فراہم کی جا رہی ہے۔ صوبے کے 27 ڈویژنل پبلک سکولوں میں بھی آٹزم سنٹر قائم کیے گئے ہیں۔انہوں نے مزید کہا کہ آٹزم میں مبتلا بچوں کی زندگی میں مثبت تبدیلی لانا حکومت کا عزم ہے۔ آٹسٹک بچوں کے علاج کی سہولت ہر ضلع تک پہنچائی جائے گی، ہر سپیشل ایجوکیشن سنٹر کو ٹرانسپورٹ فراہم کی جائے گی اور صوبے میں سنٹر آف ایکسی لینس فار سپیشل سٹوڈنٹس قائم کیے جائیں گے۔
