غزہ میں صحافیوں کی بڑے پیمانے پر نقل مکانی اور میڈیا ڈھانچے کی تباہی

غزہ (مانیٹرنگ ڈیسک) غزہ میں صحافیوں کی بڑی تعداد بے گھر ہو گئی ہے یا انہیں نقل مکانی پر مجبور ہونا پڑا ہے۔فلسطینی صحافی تنظیم کی فریڈمز کمیٹی کی رپورٹ کے مطابق 7 اکتوبر 2023 کے بعد سے غزہ میں 60 سے 75 فیصد صحافی اپنے گھروں سے محروم ہو چکے ہیں یا جبری طور پر نقل مکانی کا سامنا کر رہے ہیں۔"میڈیا ود آؤٹ والز" کے عنوان سے جاری رپورٹ میں بتایا گیا ہے کہ اس عرصے کے دوران 265 صحافی جاں بحق ہو چکے ہیں، جو کسی بھی تنازع میں صحافیوں کی اموات کی عالمی سطح پر سب سے زیادہ شرح ہے۔رپورٹ کے مطابق غزہ میں میڈیا کے 80 فیصد دفاتر اور ادارے مکمل یا جزوی طور پر تباہ ہو چکے ہیں، جس سے صحافتی نظام کو شدید نقصان پہنچا ہے اور اسے تقریباً مکمل طور پر ختم شدہ صورتحال قرار دیا گیا ہے۔مزید بتایا گیا ہے کہ موجودہ حالات میں غزہ کے صحافی روایتی نیوز رومز کے بجائے خیموں، سڑکوں اور عارضی پناہ گاہوں سے رپورٹنگ کر رہے ہیں۔رپورٹ میں یہ بھی کہا گیا ہے کہ صحافیوں کے پاس بنیادی ذریعہ صرف موبائل فون ہے، جبکہ محدود اور غیر مستحکم انٹرنیٹ ان کی خبروں کی ترسیل اور اشاعت کے عمل کو شدید متاثر کر رہا ہے۔