میکسیکو( مانیٹرنگ ڈیسک)میکسیکو میں مذہبی میلے کے دوران آتش بازی کے سامان میں ہونے والے زوردار دھماکے کے نتیجے میں کم از کم 10 افراد ہلاک اور 64 زخمی ہوگئے۔میڈیا رپورٹس کے مطابق یہ حادثہ وسطی میکسیکو کی ریاست میکسیکو کے علاقے تیمسکال سنگو میں پیش آیا۔مقامی حکام کے مطابق ہفتے کی شب چرچ کے قریب مذہبی تقریبات جاری تھیں اور بڑی تعداد میں لوگ آتش بازی دیکھنے کے لیے جمع تھے کہ اسی دوران دھماکا ہوگیا۔ دھماکے کی شدت سے چرچ کی ایک دیوار بھی منہدم ہوگئی۔ابتدائی اطلاعات کے مطابق روایتی آتش بازی میں استعمال ہونے والی ایک بیل سے اٹھنے والی آگ ممکنہ طور پر چرچ میں رکھے مزید آتش بازی کے سامان تک پہنچی، جس کے باعث دھماکا ہوا۔ تاہم واقعے کی حتمی وجہ جاننے کے لیے تحقیقات شروع کردی گئی ہیں۔
