مائیکروسافٹ صارفین کو فِشنگ حملوں سے خطرے کی وارننگ، ایف بی آئی کا انتباہ

نیویارک( ویب ڈیسک) امریکی وفاقی تحقیقاتی ادارے (ایف بی آئی) نے مائیکروسافٹ 365 سروسز استعمال کرنے والے صارفین کو ایک بڑھتے ہوئے سائبر خطرے سے خبردار کیا ہے، جس میں آؤٹ لک، ٹیمز اور ون ڈرائیو شامل ہیں۔ایف بی آئی کے مطابق ایک نئی فِشنگ مہم کے ذریعے ہیکرز ایسے حملے کر رہے ہیں جو ملٹی فیکٹر توثیق کے نظام کو بھی بائی پاس کرنے کی صلاحیت رکھتے ہیں، جس سے صارفین کے اکاؤنٹس زیادہ غیر محفوظ ہو گئے ہیں۔رپورٹس میں بتایا گیا ہے کہ سائبر مجرم ایک ہیکنگ پلیٹ فارم "کالی 365" استعمال کر رہے ہیں، جو اوتھ ٹوکنز چوری کرنے کی صلاحیت رکھتا ہے۔ ان ٹوکنز کے ذریعے حملہ آور صارفین کے پاس ورڈ کے بغیر ہی ان کے اکاؤنٹس تک رسائی حاصل کر لیتے ہیں۔یہ فِشنگ حملے عام طور پر ایسے جعلی ای میلز کے ذریعے کیے جاتے ہیں جو بظاہر مائیکروسافٹ کی سرکاری ای میلز لگتی ہیں۔ صارفین کو ایک ڈیوائس ویریفکیشن کوڈ درج کرنے کے لیے کہا جاتا ہے، اور اسی عمل کے دوران ہیکرز رسائی ٹوکن حاصل کر لیتے ہیں۔ایف بی آئی نے کہا ہے کہ یہ نیا پلیٹ فارم کم مہارت رکھنے والے ہیکرز کے لیے بھی جدید سہولیات فراہم کرتا ہے، جن میں مصنوعی ذہانت پر مبنی فِشنگ ٹیمپلیٹس، خودکار حملے اور متاثرہ صارفین کو ٹریک کرنے والے ڈیش بورڈز شامل ہیں۔سائبر سکیورٹی ماہرین کے مطابق یہ سروس مختلف آن لائن چینلز کے ذریعے فروغ دی جا رہی ہے اور اس کی ماہانہ قیمت بھی وصول کی جا رہی ہے۔ایف بی آئی نے صارفین کو ہدایت کی ہے کہ وہ غیر معروف لنکس پر کلک کرنے سے گریز کریں اور کسی بھی غیر متوقع ویریفکیشن کوڈ یا لاگ اِن درخواست کو استعمال نہ کریں، جبکہ متاثرہ افراد کو فوری طور پر متعلقہ سائبر کرائم اداروں کو رپورٹ کرنے کا مشورہ دیا گیا ہے۔