مفتاح اسماعیل کی مالیاتی اصلاحات کی تجویز، صوبوں سے وفاق کو گرانٹ دینے کا مطالبہ

کراچی( کامرس ڈیسک) سابق وزیر خزانہ مفتاح اسماعیل نے صوبائی مالیاتی نظام میں اصلاحات کی تجویز دیتے ہوئے وفاق کو ایک ہزار ارب روپے گرانٹ دینے کا مطالبہ کیا ہے۔ایک ٹی وی پروگرام میں گفتگو کرتے ہوئے انہوں نے کہا کہ تمام صوبوں کو ان کا مالی حصہ مکمل ایمانداری سے ملنا چاہیے اور آئندہ مالی سال میں چاروں صوبے مجموعی طور پر تقریباً 1800 ارب روپے سرپلس پیدا کریں۔ان کے مطابق اس سرپلس میں سے ایک ہزار ارب روپے وفاق کو گرانٹ کے طور پر دیے جائیں تاکہ وفاقی مالی خسارے میں کمی لائی جا سکے۔مفتاح اسماعیل نے کہا کہ گزشتہ سال بھی صوبوں نے مجموعی طور پر 1700 ارب روپے سرپلس دیا جبکہ وفاق شدید مالی خسارے کا شکار رہا۔انہوں نے مزید کہا کہ وفاقی آمدن کا بڑا حصہ صوبوں کو منتقل ہو جاتا ہے، اس لیے مالیاتی توازن کے لیے نئے طریقہ کار پر غور ضروری ہے۔