میرپور: ٹرانسپورٹ یونین کا کالعدم ایکشن کمیٹی کی مخالفت کا اعلان، مذاکرات کا مطالبہ

مظفرآباد( پاکستان خبر)میرپور میں ٹرانسپورٹ یونین نے ایک پریس کانفرنس کے دوران امن کو نقصان پہنچانے والی کالعدم ایکشن کمیٹی کی پالیسیوں کی مخالفت کا اعلان کر دیا ہے۔یونین رہنماؤں نے کالعدم ایکشن کمیٹی سے ہٹ دھرمی ترک کر کے فوری طور پر مذاکرات کا راستہ اختیار کرنے کی اپیل کی۔انہوں نے کہا کہ عوامی مسائل کا حل سڑکوں پر تصادم کے بجائے جمہوری اور آئینی طریقوں سے نکالا جانا چاہیے، جبکہ پاکستان اور آزاد کشمیر کو لازم و ملزوم قرار دیا گیا۔ٹرانسپورٹ یونین نے مطالبہ کیا کہ احتجاج کی آڑ میں داخلی راستوں، بس اڈوں اور ٹرانسپورٹ نظام کو بند کرنے سے گریز کیا جائے۔رہنماؤں نے ریاستی اداروں اور افواجِ پاکستان کی قربانیوں کو خراجِ تحسین پیش کرتے ہوئے خطے میں امن و استحکام کے قیام پر زور دیا۔