لاہور ( سپورٹس ڈیسک)پاکستان کرکٹ ٹیم کے سابق کپتان محمد یوسف نے نوجوان کھلاڑیوں کی تربیت کا آغاز کرتے ہوئے ایک اکیڈمی میں بچوں کو بیٹنگ کی بنیادی تکنیکیں سکھانا شروع کر دی ہیں۔مختلف عمر کے گروپ سے تعلق رکھنے والے بچوں کو تربیت دیتے ہوئے محمد یوسف نے انہیں بیٹنگ کے اہم اصول اور تکنیک سے آگاہ کیا۔اس موقع پر گفتگو کرتے ہوئے انہوں نے کہا کہ بچوں کے ساتھ کام کرنا انہیں خوشی دیتا ہے اور وہ ایک دوسرے سے سیکھنے کے عمل کو اہم سمجھتے ہیں۔ ان کے مطابق کھلاڑی کی مضبوط بنیاد اس کی طویل المدتی کامیابی کے لیے انتہائی ضروری ہے۔محمد یوسف نے کہا کہ اگر کھلاڑی کی بنیادی تربیت مضبوط ہو تو وہ تینوں طرز کی کرکٹ میں بہتر کارکردگی دکھا سکتا ہے، جیسا کہ آج کے بڑے بیٹرز میں دیکھا جا رہا ہے۔سابق کپتان کے مطابق موجودہ دور کی مختصر طرز کی کرکٹ میں بیٹنگ کا رجحان زیادہ بڑھ گیا ہے اور اس فارمیٹ میں بڑے اسکورز عام ہو چکے ہیں، جس کے باعث نوجوان کھلاڑی زیادہ تر جارحانہ بیٹنگ کی طرف راغب ہو رہے ہیں۔
